ሰበር ዜና ቅዱስ ሲኖዶስ ዐቃቤ መንበር ፓትርያርክ መረጠ

በኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ቅድስት ቤተ ክርስቲያንን የሚመራ  ዐቃቤ መንበር ፓትርያርክ  ሰየመ፡፡ በዛሬው ዕለት ባደረገው አስቸኳይ ስብሰባ  ብፁዕ አቡነ ናትናኤል የአርሲ ሀገረ ስብከት ሊቀ ጳጳስ አቃቤ መንበር ሆነው የተሾሙ ሲሆን ቅዱስ ሲኖዶስ ፓትርያርክ እስኪመርጥ ድረስ ቤተ ክርስቲያንን በበላይነት የሚመሩ ዐቃቤ መንበር ፓትርያርክ ይሆናል::

አቡነ ህዝቅኤል ዛሬ ነሐሴ 14/04 በ9.00 ሰዓት በሰጡት ጋዜጣዊ መግለጫ መሰረት ፓትርያርክ እስኪመረጥ ድረስም ብፁዕ አቡነ ናትናኤል ሲኖዶሱን በመሰብሰብም በሐላፊነት ይቆያሉ ውሳኔው ግን የተወሰነው ዛሬ ጠዋት መሆኑ ታውቋል::

በ1991 ዓ.ም የወጣውና በሥራ ላይ የሚገኘው ሕገ ቤተ ክርስቲያን

ፓትርያርክ ድኅረ ዕረፍት ወይም ከሥልጣን መውረድ (አንቀጽ 16) ኹኔታዎች

በአንቀጽ 17 ንኡስ አንቀጽ 1 – 3 የሚከተለውን ይላል፡፡

ዐቃቤ መንበረ ፓትርያርክ 

1.  ፓትርያርኩ በሞት ሲለይ ወይም በዚህ ሕግ አንቀጽ 16 መሠረት ከሥልጣኑ ሲወርድ ቅዱስ ሲኖዶስ በሹመት ቀደምትነት ካላቸው ሊቃነ ጳጳሳት መካከል በዕለቱ ዐቃቤ መንበረ ፓትርያርክ መርጦ ይሾማል፡፡ የተተኪው ፓትርያርክ ምርጫም ይካሔዳል፡፡
2. የተተኪው ፓትርያርክ ምርጫ አፈጻጸም እንደጊዜውና እንደሥራው ሁኔታ እየታየ ከ40 እስከ 80 ቀን ባለው ጊዜ ይሆናል፡፡ 
3.  የዐቃቤ መንበረ ፓትርያርክ ተግባር

ሀ. ዐቃቤ መንበረ ፓትርያርክ ጊዜያዊ ጉደዮችን ከቋሚ ሲኖዶስ ጋር እየመከረ ያከናውናል፡፡
ለ. በፓትርያርኩ ምርጫ ጊዜም የቅዱስ ሲኖዶስ ሊቀ መንበር ሆኖ ምርጫውን ያስፈጽማል፤ እርሱ ግን ከምርጫው አይገባም::

ቸር ወሬን ያሰማን፡፡