መንግስት በቤተ ክርስቲያናችን ጉዳይ በይፋ ጣልቃ ገባ

ዋና ዋና ጉዳዮች:-

• አስመራጭ ኮሚቴው እስከ ጥር 18 ድረስ እጩዎችን እንዲያቀርብ ሲኖዶሱ አዟል፡፡
• የዕርቀ ሰላም ልኡካኑ ቅ/ሲኖዶሱ አስመራጭ ኮሚቴ ከመሠየም እንዲታገሥ ጠየቁ::
• የዕርቀ ሰላም ልኡካኑ አራተኛው ፓትርያሪክ ስለሚመለሱት ኹኔታ ምልአተ ጉባኤው እንዲመክር ጠይቀዋል:: 
• የልኡካኑ አብሮ መቀደስ በአንዳንድ አባቶች ዘንድ ተቃውሞ ገጥሞታል ተብሏል
• ብፁዓን ሊቃነ ጳጳሳቱ መንግሥት የፓትርያሪክ ምርጫውን የሚከታተል ባለሥልጣን መመደቡ በግልጽ ተቃውመውታል::
• የአስመራጭ ኮሚቴውን መቋቋም የተቃወሙ አባቶች በከባድ ጫና ሥር ወድቀዋል::
• አቡነ ማቴዎስ ከሲኖዶሱ ራሳቸውን አግልለዋል
• የአስመራጭ የኮሚቴው አባል አቡነ ቄርሎስ ‹‹አልሠራም፤ አላምንበትም›› በሚል ራሳቸውን አግልለዋል::
• የቅ/ሲኖዶሱ ዋና ጸሐፊ አቡነ ሕዝቅኤል ‹‹መግለጫ አልሰጥም›› በሚለው አቋማቸው ጸንተዋል:: 

 መንግሥት ‹‹ምርጫውን በሰላማዊ መንገድ ለማካሄድ›› በሚል ከፍተኛ ባለሥልጣኑን የመደበው ከፌዴራል ጉዳዮች ሚኒስቴር የሃይማኖትና እምነት ጉዳዮች ዳይሬክቶሬት ነው፡፡ ባለሥልጣኑ አቶ ትእዛዙ ደሳለኝ የሚባሉ ሲኾኑ የዳይሬክቶሬቱ ዳይሬክተር ናቸው፡፡ ይኹንና አቶ ትእዛዙ በዛሬው የመንበረ ፓትርያሪክ ውሏቸው ብፁዓን ሊቃነ ጳጳሳቱን ለማግባባት ያደረጉት ጥረት የሠመረላቸው አይመስልም፤ ‹‹ዕርቀ ሰላሙ በምርጫው ሂደት አይሰናከልም፤ ወደፊትም ሊካሄድ የሚችል ነው፤›› ቢሉም የሰማቸው ባለመኖሩ ይህንኑ ለበላይ አካል አስታውቀዋል ተብሏል፡፡ የእርሳቸውን ሪፖርት ተከትሎ ከእርሳቸው ከፍ ያሉ ባለሥልጣን በአቋማቸው የጸኑትን ብፁዓን ሊቃነ ጳጳሳት ዛሬውኑ ማምሻውን ወይ ባሉበት በጠቅላይ ቤተ ክህነቱ አልያም ወደ ውጭ አስጠርቶ የማወያየት፣ የማስፈራራት፣ የማስጠንቀቅ አካሄድ ሳይኖር እንደማይቀር ተገምቷል፡፡ ከዚህ በባሰ የመንግስት ጣልቃ ገብነት የለም፡፡ ምናልባትም በእስልምናው የታየው ሁኔታ በኦርቶዶክሱም ይከሰታል ብሎ ማሰብ ሞኝነት ይሆነል፡፡

መንግስት በእኛ ጉዳይ ጣልቃ መግባቱን ያቁም!!!!!!!!  መልእክታችን ነው፡፡

ከኅዳር 26 – 30 ቀን 2005 ዓ.ም በሰሜን አሜሪካ ዳላስ ቴክሳስ በተካሄደው የዕርቀ ሰላም ንግግር ላይ የተሳተፈውና ከአራት ቀናት በኋላ ወደ አዲስ አበባ እንደሚመለስ የተገለጸው የቅዱስ ሲኖዶስ ልኡካን ቡድን አባላት÷ በፓትርያሪክ ምርጫ ሕግ ረቂቅ ላይ በመወያየት ላይ የሚገኘው ምልአተ ጉባኤ ሕጉን ከማጽደቅና አስመራጭ ኮሚቴ ከመሠየም እንዲታገሥ መጠየቁ ተሰማ፡፡ የልኡካን ቡድኑ ከዕርቀ ሰላሙ ንግግር በኋላ በዋሽንግተን ዲሲና አካባቢው ሀ/ስብከት ከሊቀ ጳጳሱ አቡነ ፋኑኤል ጋራ ለተፈጠሩት አስተዳደራዊ ችግሮች መፍትሔ ለማበጀትና ሊቀ ጳጳሱ በሀ/ስብከቱ ጸሐፊ ላይ ያስተላለፉትን ውግዘት እንዲያነሡ በመሥራት ላይ መኾኑ ተዘግቧል፡፡

ብፁዕ አቡነ ገሪማን (በሰብሳቢነት)፣ ብፁዕ አቡነ ቀውስጦስንና ብፁዕ አቡነ አትናቴዎስን በልኡካን ቡድኑ አባልነትና ንቡረ እድ ኤልያስ ኣብርሃን በጸሐፊነት የያዘው የልኡካን ቡድኑ÷ ለቅዱስ ሲኖዶሱ በጻፈውና በስብሰባው ላይ በንባብ በተሰማው ባለሁለት ገጽ ደብዳቤው÷ አራተኛው ፓትርያሪክ ብፁዕ ወቅዱስ አቡነ መርቆሬዎስ ወደ አገራቸው ስለሚመለሱበት ኹኔታ በስደት በሚገኙት አባቶች የተሰጡትን ምክንያቶች መርምሮ ውሳኔ ለማሳለፍ ምልአተ ጉባኤው የሚያካሂደው ምክክር አስፈላጊ መኾኑን አመልክቷል፡፡

ደብዳቤው አያይዞም÷ የዕርቀ ሰላሙ ቀጣይ ንግግር ከጥር 16 – 18 ቀን 2005 ዓ.ም በካሊፎርኒያ – ሎሳንጀለስ እንደሚካሄድ መወሰኑን፣ ሂደቱ ከመልካም ፍጻሜ እንዲደርስ ሁሉም ወገን ለሰላሙ መሰናክል የኾኑ ማናቸውንም ሥራዎች ከመሥራት ትዕግሥት እንዲያደርግ ስምምነት ላይ መደረሱን ለዚህም መፈረማቸውን፣ የሰላምና አንድነት ጉባኤው አባላት ወደ ሁለቱም ወገኖች ተጉዞ የማግባባት ሥራ እንዲሠራ የሚጠበቅ መኾኑን በማስታወስ፣ ምልአተ ጉባኤው እኒህን የሚያደናቅፉ ውሳኔዎች ከማሳለፍ እንዲታገሥ ተማፅኗል፡፡

በደብዳቤው ላይ ከምልአተ ጉባኤው አባላት የተለያዩ ሐሳቦች ተደምጠዋል፡፡ የልኡካን ቡድኑ ሦስት አባላት የቅዱስ ሲኖዶስ አባላት እንደመኾናቸው በምልአተ ጉባኤው ስብሰባ ላይ ተገኝተው በሕጉ ረቂቅ ይኹን በአስመራጭ ኮሚቴው አባላት አደረጃጀት ላይ ሐሳብ የመስጠት መብታቸው እንዲጠበቅ የተናገሩ ብፁዓን አባቶች÷ የዕርቅና ሰላም ቀን እንደማይመሽ በማጠየቅ የልኡካኑን ደብዳቤ ሐሳብ ደግፈዋል፡፡ በሌላ በኩል ደግሞ የልኡካን ቡድኑ አባላት በውግዘት ከተለያዩ አባቶች ጋራ አብረው ስለመቀደሳቸውና ስለመጸለያቸው (በዳላስ ቅዱስ ሚካኤል) ትኩረት በመስጠት፣ የመጨረሻ ነው በተባለ የዕርቀ ሰላም ንግግር ላይ ‹‹ቀን ቀጥረው ለመምጣትም ሥልጣኑ አልነበራቸውም›› በሚል የልኡካን ቡድኑን በአቋም ለመቃወም መዘጋጀታቸው ተገልጧል፡፡

ቅዱስ ሲኖዶስ ተሰብሳቢዎች ከኾኑ ብፁዓን ሊቃነ ጳጳሳት መካከል 32 አባቶች ብቻ በተገኙበት እየተካሄደ በሚገኘው የምልአተ ጉባኤው ስብሰባ÷ በውጭና በሀገር ውስጥ የሚገኙ 16 ያህል ብፁዓን ሊቃነ ጳጳሳት አለመሳተፋቸው ታውቋል፡፡ ከሕመም ጋራ በተያያዘ በስብሰባው ለመሳተፍ አልቻሉም የተባሉትን ብፁዓን አባቶች ትተን በተለይም በሀገር ውስጥ እያሉ በምልአተ ጉባኤው ላይ ያልተገኙት አባቶች (እንደ ብፁዕ አቡነ ኤልሳዕ)÷ ዕርቀ ሰላሙን ከማስቀደም አንጻር ባላቸው አቋም ከስብሰባው መታጎላቸው ‹‹ከምርጫው ይልቅ ዕርቀ ሰላሙ ይቅደም›› የሚሉ ወገኖችንትኩረት ስቧል፡፡

ለዕርቀ ሰላሙ ብዙዎች ያሳደሩት ተስፋ ለምልሞ ከመልካም ፍጻሜ የሚደርስ ከኾነ ለሳምንት ያህል የተደከመበት የምርጫ ሕግ ማጽደቅና የአስመራጭ ኮሚቴ ማቋቋም ድካምና ውሳኔን ጥቅም አልባ እንደሚያደርገው ተገምቷል፡፡ ‹‹ከምርጫው ዕርቀ ሰላሙ ይቅደም›› የሚሉ ወገኖች አራተኛው ፓትርያሪክ ወደ መንበራቸው እንዲመለሱ በሚለው አቋም ላይ ጥንቃቄ በማድረግ ብፁዕ ወቅዱስ አቡነ መርቆሬዎስ በሕይወት እስካሉ ድረስ መንበሩ በዐቃቤ መንበረ ፓትርያሪክ ወይም በእንደራሴ እንዲመራ ይሟገታሉ፡፡

ብፁዕ አቡነ ቄርሎስ÷ ‹‹የላክናቸው ሳይመለሱ  በመልእክቱ (በላክንበት ጉዳይ ላይ) ውሳኔ አናሳልፍ›› እያሉ ቢሟገቱም ተንኮል በተሞላበት ስሌት የአስመራጭ ኮሚቴው አባል ተደርገው መመረጣቸው አስገራሚ ነበር፡፡ በዛሬው ዕለት እኚህ አንጋፋ ብፁዕ አባት÷ ‹‹በሂደቱ አላምንበትም፤ በኮሚቴውም አልሠራም›› በማለት ግልጽ አቋማቸውን አስታውቀዋል፡፡ የኮሚቴው መቋቋም ውሳኔ በተላለፈበት የምልአተ ጉባኤው ስብሰባ ላይ፣ ‹‹የልዩነት ሐሳቤ በቃለ ጉባኤ ይስፈር›› ያሉት ብፁዕነታቸው የኮሚቴው አባል ኾነው የተመረጡበትን ደብዳቤም ለመቀበል ፈቃደኛ እንዳልኾኑና እንዳልተቀበሉም ተዘግቧል፡፡ 

የቅዱስ ሲኖዶሱ ዋና ጸሐፊ ብፁዕ አቡነ ሕዝቅኤል  ቅዱስ ሲኖዶሱ አስመራጭ ኮሚቴ በማቋቋም ያስተላለፈውን ውሳኔ በተመለከተ ለብዙኀን መገናኛ መግለጫ እንዲሰጡ የተላለፈላቸውን ትእዛዝ አልቀበልም ብለዋል፡፡ መንግሥት በይፋ በመደበው አንድ ከፍተኛ ባለሥልጣን ጭምር ቢታዘዙም፣ ከማዘዝም አልፎ ቢያስፈራሯቸውም ብፁዕነታቸው÷ ‹‹ምልአተ ጉባኤው ተሰብስቦ መግለጫ ስጥ ሲለኝ እንጂ አንተ ስላልኸኝ አልሰጥም›› በማለት የጽናታቸውን ልክና ዳርቻ አሳይተዋል፡፡

በሲኖዶሱ እየታየ ያለው ውጥረት ተባብሶ የቀጠለ  ሲሆን አቡነ ማቴዎስም ከሲኖዶሱ እራሳቸውን ማግለላቸው እየተነገረ ነው:: ይህ በእንዲህ እንዳለ ከየአቅጣጫው ያሉ ምዕመናን የቅዱስ ሲኖዶስን ውሳኔ በመቃወም የቤተ ክርስቲያኔ ጉዳይ የእኔም ጉዳይ ነው በሚል በከፍተኛ ንቅናቄ ለመንቀሳቀስ እየተነሳ ሲሆን አባቶች ጉዳዩን በማጤን ዕርቀ ሰላሙን የሚያሰቀድሙበትን ሁኔታ እንዲፈጠር መንገድ ይሰጣል ተብሎ ይገመታል ፡፡

እግዚአብሔር አንድነታችንን ያጠንክርልን፡፡